♕ بركان غضب ♕ بقلم الشاعر : عماد سيد
( بركان غضب )
جربت أكون هادي وخلوق وأراعي الأدب
ومالومش وأعادي أصل السكوت من دهب
وواخدها ع الهادي مستني لميعادي
وكشفت حسادي و 100 كمين إتنصب
وأروح زيارة لبيت ترحيب وكام كلمة
واخد في إيدي شموع يمكن تقيض ضلمة
وأمسح لغيري دموع وامدح بصوت مسموع
يخرج من الموضوع ويسبني ف العتمة
حبيت الم الشمل بين الصحاب بالذوق
مانبني إلا الهجر وأستنى كلمة شوق
زمن كلامه بسعر يتقال لناس تانية
وف لحظه والتانية قلب الأمير صعلوك
زمن ملوكه راعية للواطي صوت عالي
أما الخسيس له سعر ورخيصه بالغالي
الماسة بإزازة وصفيحة بناحسة
والصاغة ف وكالة
وشواربي باع خردة
والقلب ف المعدة
والسخنة ع الباردة
ويمينها ف شمالها
والعقل ف الفخدة
والشاردة والواردة
والدمعة جرحت خد وصعبت على حالي
الصورة مقلوبة والطيبة مغلوبة
والغلطة محسوبة والحسنة مشطوبة
والهمسة بالمرصاد والبسمة عاوزة ميعاد
والخلق من غلهم في الحقد موهوبة
ثعابين بتكره خير وتلومة على ذوقه
نميمة ذم الغير أصحوا أوام فوقوا
ناشرين مساوء ناس عاملين قضاة وحراس
وهدفكم التجريح من أجل م تسوقوا
ف الزحمة شفت كتير وهربت للعزلة
لكن مفيش تغير الحيرة والسحلة
وتعبت م التفكير وإتبدلت ناسي
دا الكل بيأاااسي يا الغرقة يا الوحلة
الصمت بركان صوت مخنوق في وجداني
خايف عليل مكبوت بصرخ في أحلامي
لكن في عز الموت أصحى واعيش واضحك
والفرح لو بختك حانعيدها من تاني
لكن قراري أخير العزلة تكون أحلى
بقلم //
عماد سيد
تعليقات
إرسال تعليق