& أنا إنسان & رباعيات بقلم الشاعر: إبراهيم شبل
رباعيات الشبل أنا إنسان
مقتول رغم روحي بتجري فيا
حاسسس بكل الخلق حواليا
عايش حلاوة روح في البشر
ولاحد منهم أكيد حاسس بيا
بين متقلبات الطبيعه بحضنها
دايما وخداني سرها كأني ابنها
قلبي دايما بيبكي وعيني بتشرح
فاركب حصاني الخشب اللي منها
خيمتي تحت المطر لاتسمن ولاتغني
زي مريض الإجهزه ميت ومستغني
عن حياة بشر صاروا وحوش بالفعل
محذوف من القاموس لااسم ولامعني
ازاي حمام الدفا يطير وسط الجليد
ازاي البراءة تموت بفعل صياد يصيد
بخيام المخيم دمه اتجمد بالشريان
لاقعد بالبرج ولامقفول عليه حديد
مين ظلم البشر هيغير الصوره
مين هيعيد كلمة الحق المبتوره
مين يحاول دموع الجثث لحياه
ولا مكتوب عليهم شرب المر بالآه
غايب بالوعي وجهلي سارح فيا
من قوة حجته قام وغمى عينيا
قولت اخويا حبيبي اعلم شويه
وقت الشدة رافض يمسك إيديا
يا خلق يا مخاليق البريه صوت ليكم
مين يحب يشوف فعل الطبيعة فيكم
إنسان مخلوق ليه من عطفكم تحرموه
قلبي فيكم ليه وقت الضيق مش لاقيكم
أنا أنسان وليه بالحياه منسي
لا اخترت مكاني ولايوم اسمي
مخلوع م الجذور فمات غصني
مرفوض ليه من الحياه رسمي
يادنيا براحتك وبكفيك أنا راحل
وهاخد معايا ابني وبنتي والفواحل
ياريتك ياﮂنيا تدوسي على الكواسر
وتحفظي ذكرياتي بالجبل والساحل
أنا إنسان بحبك يا دنيا انا الفنان
ريشتي بترسمك بأجمل الألوان
لعبتي بيا وصرت مهان بعد العز
أسأل الناس الدفا ومعنى الأمان
الشاعر/إبراهيم شبل
تعليقات
إرسال تعليق