& أخر مشهد & بقلم الشاعر: عاطف كبارة
آخر مشهد
عاطف كبارة
المرة دي غير كل مرة
زي ما تكون دي نهايتنا
قولي آخر كلمة مرة
ف آخر مشهد بروايتنا
المرة دي غير كل مرة
إكتمي دموعك جواكي
قومي يلا وودعيني
وإرسمي ف لمعة عنيكي
بسمة وإنتي بتقتليني
بس ما تبصيش وراكي
لما تمشي وتسيبيني
بعد ما نزل الستار
وإتكتب تتر النهاية
سقفوا يا ناس بإنبهار
قولوا روعة قولوا غاية
قولوا عني واد شجاع
ساب حبيبته لمصلحتها
وهي برضه بإقتناع
فضلت تنصر عيليتها
بكره تحكوا للعيال
كل يوم حدوتة عنا
وإضربوا بينا المثال
شوفوا ضحوا إزاي بجنة
ست الحسن والجمال
مرة حبت واد فقير
حب يوزن كوم جبال
خدها منه إبن الأمير
بقينا حكاية م الحكايات
بصوت أبطالها والصورة
على التترات
زي عشق قيس لليلى
روميو إنتحر مع جولييت
حروب عنتر عشان عبلة
إنتي وأنا بقينا حواديت
أنا راحل ومش عايز
أكون مشهور
وإيه حيفيدني م الشهرة
وأنا مغلوب
وتبقى نهايتي ف حكايتي
ذليل مكسور
تغور العيشة ف الأرض اللي
تأذي قلوب
٢٠٠ شجرة كتبت عليها
حروف إسمك
وحاكتب تاني لو مليون
أقرب منها وأحضنها
أشوف صورتك
تكلمني وأكلمها بقيت مجنون
وقالوا عليا مجزوبك
وسموني من المجانين
لإني خلاص مع غيابك
زهدت العيشة والعايشين
ومش محتاج من الدنيا
غير الميه ونص رغيف
لوحدي باعيش بلاد تانية
بانام ف جنينة ولا رصيف
بقيت واحد من الدراويش
ومش فارقة ...
أكون عايش وأنا ميت
أكون ميت وشكلي باعيش
مايهمنيش ...
عارفة إيه بيألمني
أقولك شيء بيقتلني
حدودي ف الخيال حرة
وباحلم إننا ف بيتنا
ولما صحيت من حلمي
(.... مالقتكيش .... )
المرة دي
غير كل مرة
زي ما تكون
دي نهايتنا ........
عاطف كبارة
تعليقات
إرسال تعليق