أبیات و دارمي و أبوذیّات دروب النضال
إبضیج الوکت ویّاك تتمنّه أمر بیك
او من تفرج أگرب لیك ما ترضى أحاچیك
***
الگلب برجاك طیفه إبحلم شبنه
إبنار الفرگه حب و إنهار شبنه
الدهر بوعوده ضیم او قهر شبنه
إعلی مودك و أنت لاعب طوبه بیّه
***
حبّك سکن بإلروح و إبگلبي إیفوح
او من تگعد إنت إحذاي إتداویني و إتروح
***
النضال إدروبه بإلدلال شبچن
او نصبن فخ لعند إعداي شبچن
الکسرت إگلوبهن من نعن شبچن
إعلی ضیمي او ینخن البیهم حمیّه
***
درب النضال إیلوگ للبیهم الزود
ما ملّت الضرعان من دگ الحدود
***
یا دار حبّچ ذهب ما ینحصر بأعداد
و الوطن بیچ إفتخر إنتی الهوا و الزاد
یعلی علمنه إعلی تل لا یفرح الجلّاد
مهما یحل الظلم یحلی النضال إسناد
***
یا وطن أنت إلأمل بعیوني خلّیتك
فرشیت لك بإلگلب بجفوني دفّیتك
لو ثگل حملك یخل و إبروحي ضمّیتك
ما أرید غیرك ولف بس أدري ودّیتك
***
الوطن شل روحي لو ینغث ولمهه
إویاه و إبنار أسهسههه ولمهه
أبد ما أطاوع أجزمهه ولمهه
أفتخر لو تنتهي إبدربه فدیّه
***
هلك کلمن خذل گومه وداره
او باع إوسام شمخاره وداره
إبیوم النصر و أحراره وداره
و الطمه إعلی الحلگ لطمة منیّه
***
أهلك وگفنه إویاك عوف الیکرهون
العاف أهله وگت الضیج یتسمّی مجنون
***
نزف دم گلبب بعیوني وعمهن
إبنزیفه او ختم منظرهن وعمهن
إبوهن عگلي حذّرهن وعمهن
الروح ، إمن العذاب إیجرلي أذیّه
...
إبطلقه شو و إنهار شارد خفیّه
وینه إلّي گال إویاك حد المنیّه
***
إلأمّنت بیه إسناد الیتسمّی غاوي
إبفاله او چفتني حیل شچ بإلچلاوي
***
صعب دگ المأتم نزف سلهه
البهیمه إیذرذر إبکل جسد سلهه
روحك گبل لا تندفن سلهه
ترید الذلّه لو ترثي الهویّه
***
وینك یبن دیرة هلی وینك بعد عیني
محتاجك إبغیرتك حاور او حاچیني
دهورني سبني الدهر و الهمّه تعنیني
مجروح وأنزف و أون ردتك تداویني
***
ختل سطو المظالم یمر سفهه
خضر یابس یحش بإلبراء سفهه
إلما یندل طریجه إبعراء سفهه
روحه او ذبهه بفواه الحمیّه
***
من هو العلّمك یا خبل ترماي
إبوسط گلبي و أنا بإلبحر ترماي
إلإصاله إسلاح إلي و الگاع ترماي
الیعوف إمّه او شرد ما هو إبن إبیّه
***
ظلمه او درب عاثور إتعنّیت أمر بیك
وینك عزیز الروح بعیوني أخلّیك
***
أنت إبسجن مسجون و أنا إبّطن دار
کل إحنه مظلومین ما نحمل العار
***
حبّیت أدز لك خبر حبّیت أزورنّك
طالت علی غیبتك محتاج أشوفنّك
إتحمّلت ضیم او ألم صابر و إعرفنّك
إبگلبي ما تنّسي کل لحظه أذکرنّك
***
مختنگ و أدری إشبیك متحمّل إفراگ
أحمّل و أحط إحذاك لو بیّه تشتاگ
***
لاخر عمر للشیب أظل أُوفي ویّاك
أنت إلعزیز إشلون ما أگدر أنساك
***
حبّك مرمر إریاگی وخلني
دخیلك لا تعذّبني وخلني
إمن إبعید او تهدّفني وخلني
إبسهمك. شرح گلبي او عم علیّه
***
حبّیتك او ما خنت و القهر کاتلني
وینك او موتي گرب و أنت إبعدت عنّي
شنهی السبب یا بلد شایل او تارکني
هم زین خنت العهد منّك ولا منّب
***
منّک
ك رساله إوصلت بیهه الگلب مصیوب
بإلصورة دمهه نزل راسلهه إلي محبوب
إیمثّلّي حبّه فخر او تاج الفخر مطلوب
و إسمي او إسمه إبذهب فوگ الجرح مکتوب
***
یا ریتك أنت إتصیر مرود للعیون
و إتداوی العمیان و المایشوفون
***
مرود کحل للعین ترضی أنا أداویك
ما أبطی دوم إحذاك کل لحظه أمر بیك
***
کحل و إبعینك أنا أشتاق ولفت
نظر ، کلمن یضدنه أشعار ولفت
نسیت إویاك محنة عمر ولفت
او سکنت إبعینك الجنّة أنت الیّه
***
خنت الوصیّه او رحت ریتك تمر بإلدار
حزنانه ما بطّلت و إتزیل منهه العار
حاضنتك او ما نست من ونهه مل الجار
أنت إلأمل یا ولف طفّي إبگلبهه النّار
***
إبحبّك و أنا الغرگان ضگت المنیّه
إمسیّس إببحر الشوگ بس کض إدیّه
***
یا ریت أشوفك دمع و إعلی الوجن سال إلي
او یاریت طیفك صدگ یظهر علي سال إلي
او یاریت گلبك یحن حب إبعشگ سال إلي
و أتعانق إویاك بإلحر و البرد و المطر
گلبي إبغیابك ذبل ورّم جفل والمطر
دربك صعب یا ترف او مبعد علي و المطر
او شوگك أعرفه إشکثر لو یرعد یضر سال إلي
***
إشتبه کلمن یگول الموت راحه او نوم
لا کو نوح لا ون لا فکر لا دین
الجسم یرجع الأصله إیوسّد التربان
لا تبگاله ریحه لا رجل لا عین
الروح إتسافر الربهه او تشوف إحساب
یم نکره او نکیر إهناك جیم او سین
العمل بإلدّنیا باطل یاکل المثرود
من طبخه الیطبخه إهناه زین او شین
بعد لتگول أموتن ریت أنا و أرتاح
ماکو راحة لو فاتن بشر نصّین
الصلاح إویاك بإلدنّیا إعمل المعروف
کل واحد عمل مکتوب إلك بألفین
***
یا ریت أخاوي إلموت و أصبح رفیجه
چا هدّفیت الخان و أگطع طریجه
***
إلما تریده الروح کل جیته أذیّه
یظهر لي عزرائیل لو مر علیّه
***
یألعاهدتني او رحت شو کاذب طلع عهداك
بصمیت لي إبدم حمر مو گتلي أبد منساك
شنهو السبب لوعتك او کلّمني من أذّاك
مرّن إسنین العمر و أنا إبحلم ویّاك
***
رد لي إبکلامك یخل لا تبخل علي تنتدم
ماني غریب الأصل و إبگلبي أعتقد تصتدم
أدري إبفکرك بشر یأتي ولو بل حلم
لو ما تود عشرتي حب للأبد ینختم
***
ملّیت منّك بعد چندوب أخیّط و إشد
إجروحك کثیره أصبحت کافي بعد ما أعد
شیب البراسي کثر لا بیّه أجر لا أمّد
لتشیل خشمك علي أنت الخنت و إبتعد
***
أحس شیّب شعر گلبي من أهواي
او ناره إتفتّت إبروحي من أهواي
شبه طیر إنکسر جنحي من أهواي
أفرفر و الخلگ ترکض علیّه
***
الشهم لو وصل ترقیبه من أصلاه
الأدب و الشعر تنقیبه من أصلاه
الّذی یعرف نسب صیته من أصلاه
إنتبه . خیّال موکب للقضیّه
***
الدهر شتّتنه و الواشی ومر بیك
او بلانه إبضیمه المچنّه ومربیك
گلت بلکت تمر بیّه ومربیي
او تعود إیّامنه الحلوه الزهیّه
***
وینك یبد الذات بس ردت أحاچیك
إبدلالي إتشب نار لو ما أمر بیك
***
یربّی لیش جوع إبحرب عشنه
الزلازل هدّفن و إنهدم عشنه
لا ماصخ ولاهو زفر عشنه
السبب و الباری یحکمنه إبمنیّه
***
جاسم ثعلبي الحسّاني ( جاسم محمّد الحسّاني)
17/11/1401
