♕ كل يوم ببعتلك رسالة ♕ بقلم الشاعر : طارق جلال الحسيني
كل يوم
ببعتلك رسالة
وبسأل قلبي: إيه
أخرة الحكاية؟
معقولة دي تكون
معاك النهاية؟
أفضل أحبك
وأحلم بيك
وأستنى يوم
أبوس إيديك
وأخطفك من
كل اللي حواليك
ولا مرة حتى
سألت مالك؟
إيه اللي غيّر
كل أحوالك؟
كتير حلمت
إنك تسألني
وأنا واقف قدامك
أقولك: بحبك
وصدقني إني
غارق في غرامك
وكتير أشتقلك
وقت غيابك
وكل ما أسمع
صوت كروان
أفتكر همسك
وأفتكر كلامك
طيب قولّي كلمة
طمني بيها
بتفكر فيّ
ولا سايبني
لخيالي
يلعب بيا
ويبات يحاكي
كل أحلامي؟
أنا بجد مليت
من الوحدة
هو صحيح حبك
كان غلطة؟
كذّبني وقول
إنك مشغولة
وأنا هنسى
أي غلطة
وأعتبرها هفوة
وإنك يوم
ما كنتش قاصدة
بس قولّي
أي كلمة
قولّي: انْساني
ومتبقاش أناني
وأنا هبعد عنك
وأعيش وحداني
أو قولّي
إنك لسه
بتفكر فيّ
ومشغولة بيا
زي ما أنا
مشغول بيكي
نفسي أسمع صوتك
الله يخليكي
كلمات الشاعر / طارق جلال الحسيني
تعليقات
إرسال تعليق