♕ شاب عجوز ♕ بقلم الشاعر : إسلام إلياس
قصيدة "شاب عجوز"
بقلمي إسلام إلياس
جمهورية مصر العربية
إحساس صعب علي الإنسان
لو حس ف يوم إنه عجِّز
مابقاش فايق زي زمان
ولا قادر حتي إنه يرَكِز
عايش ف صراع مع الأيام
وقلبُه وعقلُه بيتخانقوا
ولا فكّر مرة إنه يمنعهم
ولا قادر حتي إنه يحَجِّز
يبان للخلق بإنه سعيد
ويداري دموعه بإفيه
والدنيا ماشية ف مسارها
جاية عليه وبتحارب فيه
علي قلبُه بتبني ف أسوارها
وإن صَدق الفرح تنَافِيه
ولا مرة فكت ف حصارها
وإن فكّر يعارضها تصفِّيه
ومن كُتر هروبه من الماضي
بيتمني يهاجر أو ينسي
عايش علي ضهر العوامة
إللي لا عارفة تسير ولا ترسي
وكل مايفرح أو يضحك
يلاقي الدنيا حزينة وبآسة
ياخد م الفرح يدوب وردة
وياخد من الحزن بُوكِيه
براحة يا دنيا وع الهادي
كان ضربك صعب المرادي
أنا آه متعود اشوف منك
ولا مرة قدرت إني اعارض
ولا حتي بقدر أقول ليه
#شاب_عجوز
#eslam_elias
تعليقات
إرسال تعليق