♕ خلى بالكم من ولادي ♕ بقلم الشاعر : د. نجوى محمد سلام
( خلى بالكم من ولادي )
جملة قد تبدو بسيطة
واقعها في النفس عادي
بس في الكواليس صراع
ألف توهة وألف طعنة وألف نكسة
وكله عامل نفسه جنبي
كانوا لابسين القناع
كله فارد حضنه ليا للأذية
لما حان الجد ...خانوا
كلهم في الأزمة بانوا
كانوا بحر وموج ونوة
وروحي بينهم كات سفينة
بس من غير الشراع
( خلى بالكم من ولادي )
القصاص في ميزانه عادل
وكله عنده راح يدوق م الكاس قصادي
حسبي الله في ظلموا ونهشوا فيا
حسبي الله في هتكوا ستر روحي
واللي نهشوا ونسجوا م الحكايات جروحي
واللي للأوهام خدوني
ومن كاسات الحب بخداهم سقوني
كملوا أركان نواقصهم بذلي ولعبوا بيا
ممثلين بجدارة سبكوا الدور عليا
وفي الحياة كنت الضحية
( خلوا بالكم من ولادي )
مشهد النهايات بيتكرر يوماتي
والإعادة ألف كلاكيت وبزيادة
كله نسخة من حياتي
ألف ميت مليون بنية
صورة مطموسة الهوية
بره كادر الدنيا متعلق حسابها
كله بيزايد على موتها وعذابها
والغريب عند الدقون
كله متغلف ظنون
كله أعلن لوحة الكفر وضلالها
مافي دقن اتهز فيها شعرة واحدة للضفيرة
يبكي مرة في يوم عليها
ويدعي ليها
ولا يترحم على روحها وشبابها
( خلى بالكم من ولادي )
الدموع شقت فروعها بدون كلام
و الوداع لوحة رمادي
نزعت العمر اللي عيشته بدون سلام
كل تجاعيد روحي بانت
بث كان حي ومباشر
بس كله قصادي معمي والنفوس عتمة وظلام
ألف صرخة مدوا لي طوق النجاة
وكله أطرش ...كله جاهل
كله محتاج العلام
كنت فاقدة الوعي لكن للأمل
محتاجة رحمة تشدني لباب الحياة
كله شايف توهتي جوه حروبي وحدي
كله بيصقف برافو ...ومن بعيد يهتف تمام
د/ نجوى محمد سلام
الفراشة الحالمة
تعليقات
إرسال تعليق