♕ عُقلة إصبع ♕ بقلم الشاعر : مصطفى هلال
عُقلة إصبع
انا مش عارف ليه فرحان
رغم ماكنتش يوم متهنى؟
قلبى بيعزم وانا مش رافض
إنه يَهَزَر غصبٍ عنى
نِفسى أقول يجزيك ياشيطانى
ده من الضحك انا قلبى وجعنى
رغم الصوت له تَرَدُد مُزعِج
بس حقيقى انا نفسى أغنى
او للفرحة أشمر ايدى أنسى أَسَمى
بس عيونى تقول بسم الله
اصل حكاية الحزن دى طالت
باخت جداً لسه مُمِلة
قلت أَفَرَح نَفسى بنفسى
واعمل زفة تكون كدابة
عشرين سنة أحزان ماشبعتش
لسه ياعم تعيش ف كآبة؟
نفسى اتمرجح ع الأغصان
كما طرزان وامرح ف الغابة
غابة بعيدة ان شالله ف كينيا او تنزانيا
نفسى اجيب زهر الأوركيدا والجاردينيا
واصنَع عُقد جميل لحبيبتى
نفسى أٓفَرَح قَلبِك حبة
نِفسى أضَحَك فيكى بَصَمتى
نِفسى تعود وياكى جذورى
اللى حافظها أكيد بالسنتى
لما أقول لعيال 'رجالة جات ياولاد عربية رش'
واخد دُش مُبيدها الحشرى
اللى مايمنع أى ناموس
نِفسى يغَرَق وشِك ريقى
زى العيل وقت البوس
نفسى ف حضنك القى حجاب
يحمى ويرقى حبيب ممسوس
نفسى الحب ده يبقى حقيقى
زى الواقع كده ملموس
نفسى أفرحلك وافرح بيكى
وانتى عيونك تفرح بيا
نِفسى معاكى اعيش ف النور
نبقى ف مرمى الكامره الحيه
نفسى اقولك جايه معايا؟
وانتى تقولى انا طبعا جايه إيه ياحبيبى ده إسمه كلام؟
ده انا من غيرَك قلبى وروحى
حتى عيونى من الأيتام
نِفسى اجبلك كده مصاصة
أو بسكوت أو باكو لبان
نفسى اجبلك نوجا ان شالله حتى تكون ف سنانك توجع
نفسى انا أضرب فيكى بإستك
صوتك يصرخ 'أح.. بيلسع'
نِفسى اغوص وياكى ف ترعة
حجمى انا وانتى ف عقلة إصبع
ولا نعوم على وش المايه واحنا بنركب ورقة توت
انا مش صابنى جنان ولا حاجة انا باتخيل لو مبسوط
إنى اجيب بلونة كبيرة وانفخهالك
واما تفرقع اعملهالك كده زُقزيقه خرج بيوت
تقعدى بيها تِحُكى سنانك
واما تفرقع انا م الخضة
انا م الخضة عليكى أموت
انا بتخيل لو مبسوط
إنى انا وانتى ندوق الشطة
تحرق فيكى شفايف نونو
مش راح تبرد إلا بآطة
انا باتخيل لو مبسوط
صورة لعيل ماسك بطة
يضحك ضحكة حرام بقى شرعاً
ان الضحكة دى يوم تتغطا
بحلم انى اكون العيل
وانتى خلاص دلوقتى حلمتى
انتى حلمتى تكونى البطة!
مصطفى هلال
تعليقات
إرسال تعليق