& ما بقتش بفكر & بقلم الشاعر: حسام الدين صبرى
مابقتش بفتكر
•••••••••••••••••••••••••••••••••••••
مابقتش خلاص بفتكر
ولا حتى بعاتب الصور
ولا اللى بينا وانكسر
بحلم يرجع زى زمان
كأنى توهت عن سكتك
بقالى دنيا غير دنيتك
كانت حياتى لعبتك
وكل وقت وله أدان
اتغيرت أنا بإيديك
مابقتش أحن أنالعنيك
واللى كان فقلبى ليك
راح منى كأنه ما كان
لاتستغرب ولاتستعجب
منا كنت جنبك ومتغرب
اسقيك الحب وانابشرب
من نبع وليل وليل احزان
مين بيعيش بجراحه
دمعة ليلو هى صباحه
لا أنا قد الغدر ورياحه
ولا حمل كسرة كمان
دوام الحال من المحال
مابقاش الصبر هوه الموال
اتهدت بيك كل الأمال
لا كنت حضن ولا مكان
ياريت الدموع هاتفيد
اللى انطفا مش هيقيد
طال الليل والفجر شهيد
والشمس طالعه بالنسيان
عيش حياتك من غيرى
لابقيت ملكى ولاطيرى
اللى باقيلك لسه فضميرى
كلمة وداع ومش ندمان
باحلك م الوعد وم الذكرى
ومن اليمين وحلم بكره
وبرئ منها حلوه ومُره
كل ايامى معاك زمان
وياريت ماتجبش سيرتى
وحنانى وخوفى وغيرتى
ولا حتى تمسك صورتى
وتقول كان لى عنوان
غلطة ومين مابيغلطش
مين كان طيب وماتخدعش
عشت ياقلبى ماتتعلمش
أهو علمك درس اللى خان
ياريت الحب ما جمعنا
ولا زارنا الشوق وواجعنا
مخدعناش بس اتخدعنا
ياقلبى ذنبك ذنب اللى صان
••••••••••••••••••••••••
حسام الدين صبرى
تعليقات
إرسال تعليق